كل سنة و إنتو طيبين يا جماعة 🎉
و بمناسبة السنة الجديدة و الكريسماس قررت إن موضوع المرة دي هيكون له علاقة بالكريسماس في اليابان 😁
و بمناسبة السنة الجديدة و الكريسماس قررت إن موضوع المرة دي هيكون له علاقة بالكريسماس في اليابان 😁
في اليابان الكريسماس مش إجازة رسمية و بيكون في شغل و حياة عادية تماما و لكن بيكون أكتر زي إحتفال مع الأصدقاء و الأحباء و بيكون في زينه في الشارع و منتجات خاصة بالموسم ده و بحكم إن إحتفال رأس السنة (مناسبة مهمه لليابان علي فكرة) متزامن مع الكريسماس فبقي زي إحتفال موحد مع بعض، بس كان في حاجة كانت بتلفت إنتباهي و هي "هو ليه عادة عن اليابانين أكل فراخ الكنتاكي يوم الكريسماس" و ده وضع غريب لإن في أقل من ١٪ من تعداد سكان اليابان علي الديانة المسيحية بس 🤔
و لهذا السبب بدأت رحلة البحث عن الظاهرة دي و إرتباط فراخ كنتاكي بالكريسماس و وصلت لسبب و هو إن في أوئل فترة ال١٩٧٠ مع بداية تحسن الإقتصاد الياباني بعد دمار الحرب العالمية الثانية و الإنفتاح على ثقافات أخرى تم فتح أول محل لكنتاكي في الفترة دي كجزء من الإنفتاح الثقافي ده و لكن منجحش أوي في الأول بالعكس الناس بعدت عنه و فضل المحل يخسر فلوس كتير و كان KFC الياباني في حاجة ضاروية كحل عشان يعوض الخسارة المادية إلي بيواجهها دي 😱
الفكرة جت من مجموعة من الأجانب إلي كانوا في اليابان و بيدوروا علي مكان في ديك رومي لإنها عادة في إمريكا إنهم ياكلوا الديك الرومي مع العائلة في موسم الكريسماس و لكن راحوا لكنتاكي كحل بيدل - الفارخ ولاد عم الديك الرومي أو حاجة كده - و من هنا الفكرة جت "ياتري هل ينفع نستغل عم كنتاكي ذات نفسة بشكل مختلف؟" و هو إنه يلبس زي بابا نويل و نروج لفكرة الإحتفال بعيد مش موجود في اليابان، هل ده ممكن؟ 🤔
طبعا عشان فكرة الإنفتاح دي تشتغل صح الهدف هو كان جمهور الأطفال "شد الأطفال و أهلهم هيجوا وراهم علي طول" و طبعا كان في حملة كبيرة علي التليفزيون وقتها و كان الهدف منها هو "تحب تجرب الجو الأمريكي؟ تعالي إحتفل معانا و مع بابا نويل في محل كنتاكي بالكريسماس" و طبعا عشان كانت حاجة غربية لفتت الأنظار بسرعة و طبعا لو أنت طفل و شفت بابا نويل هتكون عاوز تروح عشان تتصور معاه في بيته و في الحالة دي كان محل كنتاكي هو بيت بابا نويل الياباني و كانت حملة ناجحة جدا 😁
حاجة كمان مساعده في الحوار ده و هو إن وقت الطعام في اليابان هو وقت العائلة و ده يعد وقت مقدس في البيت الياباني و فكرة تسويق جردل الفراخ الكبير للعائلة عشان الأسرة كلها تعيد مع بعض ساعد في ترويج الفكرة أكتر و بحكم إن الكريسماس كان فكرة غربية عموما علي اليابان في فترة ال٧٠ و ماكنش حد عارف بالإحتفال ده فحرفيا سلسلة كنتاكي كانت سبب في شهرة الكريسماس في اليابان و بقت عادة من ال٧٠ إنهم كل سنة يروحوا يجيبوا الجردل بتاع الفراخ العائلي يوم ٢٥ ديسمبر من كل سنة و بيكون في طوابير علي كنتاكي في الوقت ده بشكل كبير جدا و ديما بيكون أكبر مكسب مادي في السنة لكنتاكي بيكون في فترة الكريسماس🎄
و هكذا بقي موضوع كنتاكي ده عادة سنوية لليابانين مع إن مفيش إي فرق في الطعم بين الكنتاكي في الايام العادية و بتاع الكريسماس بس ممكن يكون في مينو خاصة بالكريسماس و بيتم فتح الطلب عليها يمكن قبل الكريسماس بشهر أو شهر و نص و بتتحجز بسرعة جدا كمان و للعلم كنتاكي في اليابان سوقه كبير جدا لدرجة إن اليابان هي ثالث أكبر سوق لكنتاكي في العالم بعد الصين و أمريكا 💁♀️
فعلا حاجة غربية و لكن لطيفة جدا و بالطريقة دي إندمج عيد الميلاد المجيد مع عيد رأس السنة إلي يمثل زي عيد مهم في اليابان زي العيد الكبير كده في مصر و بقت الفترة دي زي إسبوع إحتفالي لليابان كلها و عموما أتمني يكون الموضوع نال الإعجاب و كل سنة و إنتو طيبين و يارب تكون ٢٠٢٠ سنة كلها خير علينا جميعاً😁
