و لسه مع الحاجات الخاصة بكيوتو و المرة دي هنتكلم عن حاجة نادرة جدا و هي "الأويران" أو 花魁 😲
الأويران هي حاجة مختلفة تماما عن الجيشا علي الرغم من التشابه في المكياج و لكن عكس الجيشا إلي دورها خدمة الزبون بشكل ترفيهي دون إي إقراب جسدي، الأويران هي ما تسمي بفتاة المتعة أو فتاة الليل و لكن مع الفرق إنها بتكون غنية و مشهورة جدا و بيكون عليها الطلب من ناس من أرقي طبقات المجتمع الياباني و هي إلي بتقرر لو تقضي الليله مع الشخص ده أو لا، غير إن ثمنها غالي جدا فوق كل ده، يقال إن مرتب سنة لشخص عادي ياباني يساوي ثمن ليله معاها، غير إنها عندها نفوذ و علاقات قوية جدا و ده طبعا كان في زمن اليابان القديمة أو عهد الأيدو، حاليا الأويران أكثر زي رمز ثقافي للحضارة اليابانية القديمة لإن شغل فتيات الليل تم منعه بشكل قانوني في ١٩٥٨ 💁♀️
في التاريخ القديم كان موجود فكرة الحرملك (مكان مخصص للحريم الخاصة بالملك أو السلطان أو شخص ذو سلطة كبيرة و بيكون الحريم دول ممنوعين من مغادرة البيت ده لإنهم ملك لصاحب الحرملك) و عن طريق قضاء وقت و معاشره بين الحريم بتاع الحرملك و الشخص ذو سلطة كبيرة زي ملك مثلا، تكتسب المرأة وضع إجتماعي خاص و نفوذ كبيرة و ده كان مقبول زمان و حتي في نص في القرآن بيقول "ما ملكت إيمانكم" أو الحرملك بمعني تآني و ده كانت حاجة موجوده في أوقات زي العصر العثماني مثلا 🤔
فكرة الأويران هي أقرب للمبدأ بتاع سلطة حريم الملك القويات مع الفرق في اليابان ماكنش في حرملك، كان فيه فتاة الليل صاحبة الجمال و الشكل الساحر و ده بيبان من اللبس و المكياج الفاخر للأويران و الكيمونو إلي كله معمول من الحرير و بيكون مطرز بأحلى الأشكال، غير إن الشعر بيكون متزين بزينة شعر مخصوصه للأويران، غير إن إي جزء باين من جسم الأويران من تحت الكيمونو الفخم بيكون مدهون بالإبيض و ده يشمل الوجهه و الرقبه و الإدين و القدمين و ده لإن اللون الأبيض كان رمز الرقي و الجمال في اليابان القديمة 🏯
في العصر الحديث الأويران بتلبس باروكه وزنها ١٠ كليو غير لبسهن إلي بيكون حاولي ٣٠ كليو و ليهم صندل خشبي طويل غير إلي الجيشا بتلبسه و بيكون ليهم إحتفالات خاصه بيهم و لكن مش في كيوتو للأسف، الإحتفالات الخاصة بيهن بتكون في أساكوسا، ولكن في حاجة في كيوتو لطيفة تخص الأويران و هي إستديوهات تصوير بتحضر الناس إلي عوزه تجرب شكلها كأويران من ناحية المكياج و اللبس و غيره من الحاجات الخاصة بشكل الإويران و بتاخد ليهم صور في إستديوهات محضره بديكور عهد الأيدو و ممكن تكون جلسة التصوير للبنت بس أو للأحباء عشان يخدوا جلسة تصوير مع بعض من حيث إن البنت بتكون أويران و الشاب بيكون شوجان 👏
لو إنتو في كيوتو و عوزين تجربوا الموضوع ده هتكون فرصة حلوه ليكم و أنا ارشح الفكرة دي عموما بالذات لو ٢ رايحين شهر عسل و عوزين صورة مميزه فيها الروح اليابانية بشكل ملحوظ 💪
