لتاريخ الياباني أساسي فيه الساموراي و طبعا أكيد مش هانسي متحف الساموراي في رحلتنا لكيوتو إلي لسه مستمرة و إلي كل مرة أدور فيها ألاقي حاجات أكتر و أكتر تخلي كيوتو هي المدينة المفضلة ليا في اليابان ❤️
متحف الساموراي موجود منه في توكيو بس بحكم إن إحنا تركيزنا علي كيوتو الجميلة فده إلي هتكلم عليه في البوست ده و طبعا كلنا عارفين إن الساموراي هما المحاربين في الحروب اليابانية القديمة و كان ليهم دروع معينة عشان تحمي أجسادهم و إلي كانت مصنوعة من تجمعية من حديد و خشب و جلد متخيطة بخيط من الحرير مع بعض و طبعا الكاتانا إلي معروفة بحدتها و الفنون القتالية الخاصة بيها (قصدي رياضة الكندو) 💁♀️
محتف الساموراي بكيوتو موجود في قلب كيوتو بجانب سوق نيشيكي الشهير و غير انه مليان بتاريخ لدروع الساموراي و أشكال الكاتانا المختلفة يوجد بالمتحف تجربة لبس الساموراي و تدريب بيسط علي إستخدام الكاتانا و مش بس كده، في كمان تجربة الكيمونو و اليوكاتا و مراسم الشاي الياباني، كمان تجربة النينجا و فوق كل ده في عرض خاص لساموراي متدربين علي إستخدام السيوف كمان و المتحف مفتوح طول السنة 🌸
أكيد المكان ده لازم يكون علي الخريطة بتاعكم في رحلتكم لكيوتو عشان المكان ده مجمع تاريخ و تجارب يابانية تقليدية في مكان واحد و هو مكان حلو أوي لأي حد له في الثقافة اليابانية سواء لو عندكم إهتمام تاريخي أو محبي الأنمي أو الفنون القتالية أو فضول عام عن الحاجات إلي بتميز اليابان ✌️
