تعالو نتكلم إنهدرة عن مشكلة كبيرة في اليابان و هي الإعتزال المنزلي أو "الهيكيكوموري" و للأسف هي مشكلة حقيقية في اليابان 😥
الإعتزال المنزلي أو الإعتزال عن الناس هي ظاهرة نفسية و موجودة في كل بلاد العالم لكن في اليابان المشكلة دي كبيرة لدرجة إنها مشكلة وطنية عندهم، الإحصائيات بتقول إن في بين نص مليون و مليون شخص عندهم المشكلة دي و المشكلة دي بيعاني أكثرها من الشباب الصغير من عمر ما بعد المرحلة الإعدادية فيما فوق و الإسباب إلي وصلت الشباب ده للحالة دي بتكون بين التنمر و ضغط المجتمع الشديد في اليابان 👩💻
خالينا فاكرين كام حاجة: الأول و هي اليابان عندها أكبر نسبة رواد في العالم و نقدر نقول إن تقربيا ثلث سكان اليابان فوق ال٦٥ سنة و عدد المواليد بتقل و حاليا في مشكلة أقتصادية كبيرة بسبب قلة العمالة و ده أدي لإستعانة عدد كبير من سكان دول الصين و إندونيسيا و ماليزيا عشان الشغل في وظائف زي عمالة في السوبر ماركت أو سائقين تاكسي.... إلخ و للعلم في زيادة في الضرائب في اليابان برضة و كل دة كوم و الضغط النفسي للمجتمع الياباني ده كوم تاني خالص و ده هينقلنا للجزء التاني من المشكلة بتاعت إعتزال الناس 😞
الجزء التاني هو ضغط المجتمع للحصول علي وظيفة عالية بمرتب عالي و ده عن طريق حصول أعلى درجات في المرحلة الثانوية و الجامعية و دة بيوصل إن الطلبة بتاخد زي دروس بعد المدرسة في حاجات زي الستنر عندنا في مصر و نقدر نقول الثانوية في اليابان الضغط النفسي بتاعها زي إلي في مصر بالظبط لكن الضغط ده بيكمل لحد مرحلة الجامعية كمان، في إمتحانات قبول للمدارس الثانوية و الجامعة كمان و مهم إن الواحد يقدر يدرس في حاجة كويسة عشان يجي له شغل كويس و بمرتب كويس لإن اليابان فيها حتت كتير الحياة فيها غالية جدا زي توكيو مثلا 😫
الجزء الثالث للمشكلة دي هو طبع المجتمع الياباني في تجاهل المشاكل الفردية من الأجل الصالح العام، كتير من الناس في اليابان مش عندهم الجزء بتاع لو عندك مشكلة فردية تعالي و أتكلم فيها،"أزاي تكون عندك رائ مختلف" أو "إزاي يكون عندك مشكلة مثلا ممكن تأثر على الأخرين، أنت كدة هتكون أناني" و دي مشكلة موجودة في جزء كبير في اليابان، مثلا لو في طلبة يابانين شعرهم الطبيعي بني المدرسة بتجبرهم إنهم يصبغوه إسود عشان يكون "زي الباقي" لأن الإختلاف مرفوض و ممكن الطالب يتمنع من الدراسة لو رفض الموضوع ده أو مثلا النوميكاي أو 飲み会 أو خروجة الشرب بعد الشغل لو مؤظف رفض دعوة المدير بتاعه مهما كانت السبب ممكن يحصل للموظف مشاكل في الشغل أو تنمر و انه المفروض يسمع الكلام "زي الباقي" حتي لو كان في ظروف مثلا زي الخروجة دي مكلفة علي الموظف و مش عاوز يصرف كتير أو كدة 😥
المشاكل دي و طبعا في غيرها خلقت ضغط غير عادي للشباب دول و خلتهم منعزلين في عالمهم الخاص كمهرب من الضغوط دي و طبعا دي مشكلة كبيرة جدا و اليابان بتحاول تحل المشكلة دي بتقديم برامج دعم نفسي للشباب دول غير إن في محاولات لتغير التفكير الياباني الشديد ده لكن برضة عدم التميز عمل مشكلة للشباب كتير في اليابان و هي أن كتير منهم مش عارف هو عاوز ايه و هما كبروا في إيطار معين متعودين عليه و خلاص ، للأسف كتير منهم بسبب الضغوط مثلا مش بيكون مستوعب فكرة الجواز مثلا و إن الشغل هو أهم شئ أو بمعنى أصح الدور الوحيد الي هو متعود عليه هو الشغل و خلاص و طبعا دة بيزود الإكتئاب بشكل كبير برضة و طبعا كل الضغوط دي زودت نسبة الإنتحار في اليابان بشكل كبير جدا بحيث إن الإحصائيات في ٢٠١٤ قدرت إن في حوالي ٧٠ منتحر كل يوم في اليابان و طبعا الإنعزال المنزلي حالة تانية مترتبة من وضع كتر الضغوط النفسية دي برضة 😭
صحيح اليابان بلد حلوه و كل حاجة لكن لكل مكان فيه الحلو و الوحش و للأسف دي واحدة من نواحي اليابان إلي مش بحبها لكن هي مشكلة يستحق الحديث عنها برضة، آتمني يكون الموضوع نال الاعجاب و تكونوا تعرفوا شوية أكتر عن اليابان 👏
