مساء الخير عاملين إيه؟ يارب تكونوا ديما بخير 😁
النهارده هيكون بوست عن تجربتي الخاصة في قرائة المنجا اليابانية بلغة بلد أم المنجا و الأنمي و يمكن البوست ده هيكون مختلف لانه عن تجربة بس قلت لازم أقولكم عليها ✌️
الحقيقة أنا عمري ما قرأت كتاب منجا ياباني كامل قبل كده، أنا أكتر في سكة الكتب اليابانية للناس الكبار إلي بتدرس ياباني و دي كتب بستعيرها من مؤسسة اليابان و لكن بحكم إني عندي عرض تقديمي عن كتاب ياباني في مؤسسة اليابان كجزء من نظام إمتحانات اللغة اليابانية الخاصة بالمستوي التاسع من دورة دراسة اللغة اليابانية بمؤسسة اليابان المرة دي قررت إني أقرأ منجا و اشوف الدينا ماشية إزاي 😤
قررت اني إبدأ بحاجة سهلة أو منجا للأطفال و دول بيكون فيها الفوريجانا (نطق الكانجي بالهيراجانا جنب الكانجي) إما المنجا إلي قرأتها هيكون ليها بوست خاص بيها و إيه إلي عجبني فيها في وقت لاحق، المهم كان في فرق كبير بين قرائة الكتب و المنجا و السبب هو في الرسم و طريقة الحوار 📖
الكتب مش ديما فيها رسم و شكل الرسم مش حلو آوي زي المنجا، طريقة الحوار في الكتب بيكون في فكرة الوصف بتاع المشهد عن طريق الكلام و الواحد بيتخيل الموقف في باله، أما المنجا فيها المشهد موجود و مفيش وصف بالكلام لكن الرسم هو المعبر الأساسي و طبعا في حاجات زي المؤثرات الصوتية و التعبيرات المبالغ فيها إلي بتكون مضحكة في أوقات كثيره و يمكن الحاجات دي كانت مناسبة بالنسبة لنوعية المنجا إلي قرأتها و هي منجا عن الحياة الواقعية و لكن بشكل دمه خفيف، ماكانش في معركة أو أي حاجة من الحاجات إلي فيها أفكار ثقيلة 🎉
منجا من ناحية الكوميديا و إدماجها مع الحياة الواقعية بشكل لطيف خلي الواحد مبسوط و مستمتع و أنا بقرأ المنجا، غير التقدير العام للرسم و التفاصيل بتاعها إلي كانت في منتهي الجمال و فعلا عبرت عن نفسها بشكل رائع في رائي و خلت الواحد فعلا مندمج في عالم المنجا دي 😁
أعتقد إن الجو العام الخفيف و الكوميديا كانت سبب في إستمتاعي بالمانجا دي و خلي فهمها أسهل ليا لأن مفيش تعبيرات صعبة كانت موجوده فيها خالص و عشان كده أنا أحب أرشح النوع ده من المنجا لأي حد بيتعلم ياباني و عاوز حاجة خفيفة و سهلة في القرائه و ممتعة في نفس الوقت 😁
