ظاهرة الأوتاكو في عيون اليابانين و إرتباطها بواحدة من أبشع الجرائم في تاريخ اليابان

مساء الخير 😁
أسفة علي تأخير الموضوع ده عليكم لكن أخذ شوية من البحث و هي ظاهرة الأوتاكو في عيون اليابانين 💁‍♀️

كنت ديما بسأل نفسي هو ليه اليابانين مش بيحبوا الشخص إلي مسي نفسه "أوتاكو" ؟ إيه سبب عدم إعجابهم بالكلمة إلي أصلها في المعني هو المنزل بالكانجي و ده الكانجي بتاعها بمعني البيت 御宅 ، كانت حاجة محيره للغايه 🤔

فقررت إني أدور أكتر و أعرف أساس الظاهرة دي 👏
الأول أصل الكلمة ظهرت في دارسة لشخص أسمه "أكيو ناكاموري" لمنجا "منجا بوريكو" في ١٩٨٣ و للأسف دي منجا هنتاي و ده كان أول سبب يخلي الناس تربط بين إن أي حد مسمي نفسه "أوتاكو" له في سكه الهنتاي، أنا الصارحة مش عارفة شكل الأنمي في الفترة دي كان عامل إزاي لأنها كانت فترة قبل ما أتولد 😂 بس لو تحبوا ممكن أدور علي الموضوع ده و أعرف أكتر الدينا كانت إيه نظامها وقتها 👏

عموما ده مش السبب الوحيد و لكن في سبب تأنى كمان و للأسف مرتبط بجريمة بشعه و هنا هاحط تحذير لكل واحد هيكمل قرائه في الموضوع و هو إني هاذكر بعض الإحداث إلي حصلت في الجريمة دي فلو مش هاترتاحوا من نوعية تفاصيل - قد يكون فيها تفاصيل تكون مظلمة - بلاش تكملوا قرائة البوست و لكن علي أد ما هاقدر هحاول إني أكتب النسخة الخفيفة من تفاصيل الجريمة دي 👩‍💻

تعد الجريمة إلي هاتكلم عليها من أبشع الجرائم في تاريخ اليابان و حصلت في ١٩٨٨، المجرم "تسوتومو ميازاكي" قام بقتل ٤ بتات تحت سن ال١٠ سنين بين ١٩٨٨ و ١٩٨٩، السبب في تحوله لمجرم هو دخوله في إكتئاب بعد وفاة جده في ١٩٨٨ و أول دليل علي تصرفه الغريب هو أنه أكل بعض من بواقي جده بعد ما تم حرقها عشان "يكون ديما معاه" لإن جده كان أحن عليه من باقي أهله إلي علي حسب كلامه كانوا مهتمين بالماديات أكتر من النفسيه بتاعه و إن سبب قتل البنات دول كان سبب في إعتقاده هتكون سبب في عودة جده من الموت لأن الراجل الفأر (شخصية تخيلها) هيرجع جده بقوتة الخارقة لو فضل يقتل في بنات أكتر و إنه مش هو السبب وراء قتل البنات دول بل السبب الأساسي هو "الرجل الفأر"، غير كده كان شخص نفسيا مش مستقر خالص من التنمر إلي حصله بسبب تشوه في إيده غريب جدا حصل بسبب إن كان نتيجة لولادة مبكرة نابذة من علاقة غير شرعية بين أبوه و واحدة من أخواته البنات :")

طبعا كطفل بيكبر بتشوه فظيع في الإيد كان عرضة للتنمر الدائم و ده غالبا السبب الأساسي في إختراع "الرجل الفأر" كصديق وهمي له، طبعا التنمر له تأثير على النفسيه بشكل كبير و ده أثر فيه لدرجة إن دراجاته نزلت جامد و مدخلش جامعة كويسة زي ما كان عاوز (كان حلمة يكون مدرس إنجليزى) و السبب ده كان سبب في دخوله كلية متواضعة لدراسة التصوير و أشتغل مع والده في الجرنال الخاص بيه 👩‍💻

عائلة ميازاكي كانت مرتاحة ماديا و معروفه كويس في منطقة إيتسوكايتشي بمجاورة نيشيتاما بتوكيو، المهم في الوقت ده كان عايش مع أهله و ظهرت علي المجرم تصرفات أغرب مع الوقت زي مشاهد أخته وقت الإستحمام في السر و لما عرفت و قالت للأم و لما راحت تواجه إبنها راح هجم علي الأخت و الأم، غير إمتلاك عدد كبير من الأنمي إلي كان في عداد الهنتاي إلي فيه تعذيب بشكل مبالغ فيه (فوق ال٥٠٠٠ شريط) و من هنا أتسمي بلقب الأوتاكو القاتل و تم ربط فكرة الأوتاكو بالتصرفات النفسية العجب دي :")

طب شكل الجرائم بتاعه عاملة إزاي علي كده برضة 🤔 ؟
في حالات ال٤ بنات كل واحده تم تشويه الجثث بشكل أو بآخر غير أنه شرب دم من واحده من جثث البنات و إغتصب الجثث و كان في حالة إحتفظ بإجزاء من جثة و كان بياكل من لحمها و كمان بيبعت بعض من بواقي الجثث لأهلهم عن طريق تقطيع حروف من المجلات و جرائد و إرسالها مع إجزاء من الجثث زي الأسنان مثلا، ده غير الأتصالات الصامته بيهم بشكل مرعب زي أفلام الرعب 😱

للأسف كانت الجرائم الأولى في وقت و مكان معروف بالأمان و دي كانت منطقة سايتاما إلي كانت معروفة إنها أمان جدا لدرجة إن تقربيا ماكنش في نوعية الجرائم البشعه دي خالص و المنطقة الثانية إلي حصل فيها الحوادث التانية كانت توكيو 😣

سبب بعض الجرائم بحكم الأمان الزيادة هو إن محدش نبه علي الأطفال دي إنهم مايركبوش مع شخص مش عارفينه و ده إلي حصل، البنات ركبوا معاه عربيته علي أساس أنه ده شخص مفيش قلق منه أو إنهم أتعلموا إنهم لازم يسمعوا كلام الكبار و خلاص، الصراحة مش متأكدة من السبب بالظبط لكن ماكنش في إجبار للبنات للركوب سيارة القاتل و هو ذات نفسة كان بيختار الضحايا بشكل عشؤائي للعلم، برضة البنات دول بين سن ٤ ل٧ سنين فصعب نحكم على التفكير بتاعهم في السن الصغير أوي ده 💔

طريقة إحتفاله بالنصر كان عن طريق أخد هدوم البنات بعد الإنتهاء من قتلهم في مناطق مهجورة زي الغابات مثلا و ترك الجثث أو دفنها ولكن تم القبض عليه في سنه ١٩٨٩ لما كان بيحاول قتل الضحية الخامسه و لكن أخت البنت الكبري هربت لما شافت الراجل ده و راحت علي باباها إلي جه عشان يحمي بنته لما شافها عريانه و المجرم بيحاول يصور البنت، حاول الأب الهجوم عليه و لكن المجرم هرب و هو رايح علي العربية بتاعته البوليس كانوا في الإنتظار بعد إتصال الأب بيهم و تم القبض عليه و الحكم بالإعدام كان سنه ١٩٩٧ و تم إعدامه في ٢٠٠٦ و كان في جريمة تانية برضة بتفاصيل قربية بعدها بكام سنة و برضة الحكم كان بالإعدام، إيه سبب إن محدش بلغ عنه في ال٤ جرائم إلي فاتوا هو غالبا خوف أهالي الضحيا إنهم يكونوا الهدف القادم ليهم، هو عارف العناوين بتاعتهم و نمر تليفوناتهم عموما 😨

و من هنا كان السبب في عدم تقبل اليابان لفكرة كلمة "أوتاكو" بحكم الميديا و تصويرها لجريمة الأوتاكو القاتل بشكل بشع و ربط تصرفات القاتل بأي حد يسمي نفسه أوتاكو و مع إن في تقبل أكتر لثقافة الأنمي باليابان حاليا إلا إن كتير من اليابانين بالذات الجيل القديم مش بيحب فكرة "الأوتاكو" دي و كتير ممكن كمان يخبي أنه بيشوف أنمي غير طبعا التشبيه التصويري الغريب إن "الأوتاكو" في الأنمي هو أنه كائن مش نافع للمجتمع الياباني و مش بيشتغل و لا بيساعد في بناء المجتمع الياباني و عاله أكتر من أي شئ و طبعا أصل الكلمة و إرتباط الكلمة بجريمة تعد من أكتر الجرائم بشعا في اليابان، كل ده هو أساس الظاهرة دي، حد كان يعرف أن أصل كلمة أوتاكو كانت مظلمة أوي كده :")

أتمني يكون الموضوع نال الإعجاب علي الرغم من التفاصيل الصعبة بتاعت الموضوع :")